नरक

सोम, २४/०७/२००६ - ०९:२६

स्तब्ध रात्री त्या अचानक झोप माझी मोडली
देव वदला प्रकटुनी की लीज़ (lease) माझी संपली

थबकलो, काही कळेना, घर्मबिंदू चमकले
यमदुता दुरुनीच यामाहा वरी मी पाहिले

संपले, कळले मला, पळुनी तरी जाऊ कुठे
घेउनी मजला वरी, मोटार आकाशी उठे

पोचलो, उड्डाण करुनी, भव्य मोठ्या दालनी
लोचनी सामावल्या ना दालनीच्या लायनी

तिष्ठलो, मी जाळले साडे सहा घंटे कसे
आसने ना मासिके, टी. व्ही. वरी काही नसे

लागला अंती कधी नंबर कुण्या खिडकीमधे
'अप्सरा - बी.कॉम.' खोटे गोडसे हसुनी वदे

फॉर्म भरले शेकडो, केल्या हजारो चौकशा
तीन पडले गुण कमी, नरकाकडे वळल्या दिशा

जाउदे, स्वर्गात धनिकांचेच चाले तेवढे
अप्सरांचे लाड आम्हाला कुठे हो परवडे

काहिसे घडले अचानक, परत भू वर सोडले
"वाढली आरक्षणे नरकामधे", मी ऐकले

-ॐ